என் அடையாளத்தை அசிங்கப்படுத்தும் இந்தியா..!!

இந்தியாவுக்குள் நான் தமிழன்.

வடநாட்டில் நான் மதராஸி.

வெளிநாட்டில் நான் இந்தியன். இந்தியா தாண்டி வெளியே எங்குமே எனது அடையாளம் இந்தியன் என்பதே. அதாவது மற்றவர்கள் உங்களைக் காணும் போது விளிக்கும் அடையாளம் இந்தியன் என்பது.

ஆனால் , வெறும் 50 - 60 ஆண்டுகளாகத் தான் நான் இந்தியன் ...

அதற்கு முன்பு..??

பல நூற்றாண்டுகளாக என் அடையாளம் , எனது தாத்தாவின் , பாட்டனின் , முப்பாட்டனின் , கொப்பாட்டனின் அடையாளம் தமிழன்.

ஆக பரம்பரை அடையாளம் தமிழன்....!!!

இந்தியா என் தாய்நாடு.

இந்திய அரசு எனது அரசாங்கம்.

ஆனால் என் தாய்நாடு நான் சார்ந்த இனத்தை , நான் பேசும் மொழி பேசும் கூட்டத்தை , என் பரம்பரையை அவமானப் படுத்துகிற போது என் அடையாளம் அசிங்கப்படுத்தப் படுவது போலவே உணர்கிறேன்.

எங்கோ இருக்கும் சீனாவோ , ஈரானோ , க்யூபாவோ இலங்கையை மனித உரிமை மீறல்களுக்கான ஐ.நாவின் விவாதத்தில் ஆதரிக்கும் போது எழாத வலி எனக்கு இந்தியா , எனது தாய்நாடு , எனது வெளியுலக அடையாளத்தை தந்த இந்தியா ஆதரிக்கும்போது எழுகிறது.

இந்தச் செய்தியைப் படியுங்கள்......

இலங்கையின் மனித உரிமை மீறல்கள் குறித்து விசாரிக்க அவசியமில்லை : இந்தியா

இலங்கையில் மனித உரிமைகள் தொடர்பாக விவாதிக்க அழைக்கப்பட்டுள்ள சிறப்பு கூட்டத்தின் நோக்கமும் பயனும் குறித்து தமக்கு கடுமையான தயக்கங்கள் இருப்பதாக இந்தியா கூறியுள்ளது.

இலங்கையில் நீண்ட காலமாக நடைபெற்று வந்த மோதலை தற்போது இலங்கை முடிவுக்கு கொண்டுவந்த நிலையில், அங்கு அனைத்து சமூகங்களுக்கும் இடையே ஒரு நல்லிணக்கத்தையும் ஒற்றுமை உணர்வும் ஏற்படடும் வகையான நடவடிக்கைகளை முன்னெடுப்பதே சர்வதேச சமூகத்தின் செயலாக இருக்க வேண்டும் என்றும் கூறியுள்ளது.

இப்படியாக ஒரு சிறப்பு அமர்வை திணிப்பதன் மூலம், சில உறுப்பினர்கள் ஐக்கிய நாடுகளின் மனித உரிமைகள் ஆணைக்குழு செய்யக் கூடியப் பணிகளை அரசியலாக்கி விட்டார்கள் என்றும் இந்தியத் தூதர் கருத்து வெளியிட்டுள்ளார். மேலும் இன்னும் ஒரு வாரத்தில் இந்த ஆணைக்குழுவின் வழக்கமான கூட்டம் நடைபெறவுள்ள நிலையில், இந்தக் கூட்டத்துக்கான தற்போதைய தேவை குறித்தும் இந்தியா கேள்வி எழுப்பியுள்ளது.

இன்று யாரும் சனாதிபதி இராஜபக்சேவை உடனே தூக்கில் போட வேண்டும் என்று சொல்லவில்லை. குற்றங்கள் இழைக்கவில்லை என்று அன்றாடம் பேசும் இலங்கை அரசு குற்றம் புரிந்ததா இல்லையா என்பதற்கான விசாரணை மட்டுமே நடைபெற வேண்டும் என்று மனித உரிமைகள் ஆணையம் வலியுறுத்துகிறது. அதற்கான அமர்வுதான் இது.

அந்த உரிமை கூட தமிழினத்திற்கு மறுக்கப்படுவது என்ன நியாயம் ? இந்தியாவின் மக்கள் தொகையில் 7 முதல் 8 சதம் இருக்கும் ஒரு பகுதியினரின் உணர்வுகளை புரிந்து கொள்ளாதது அந்த இனத்தானின் தவறா இல்லை அரசாங்கத்தின் தவறா?

சீக்கியர்களின் தலைப்பாகைக்கும் , சீக்கியர்க்களுக்கு விதிக்கப்பட்ட வரியினைப் பற்றியும் சீக்கியர்கள் இரண்டு பேர் செத்ததுக்கு அங்க்லாய்க்கிற எமது பிரதம அமைச்சர் , இங்கே தமிழகத்தில் பத்துக்கும் மேற்பட்டோர் தீக்குளித்த போதும் அதைப் பற்றி வாயே திறக்கவில்லையே , இது என்ன ஒரு தலைப்பட்சம். ?

யூத இனம் அணியணியாகப் படுகொலை செய்யப்பட்ட போதும் செத்துப் போய்விட்டிருந்த ஹிட்லர் மேல் நடத்தியிருந்த விசாரணைகள் போன்றதொரு விசாரணை மட்டுமே தேவையென கேட்கிறார்கள் ஈழத் தமிழர்கள்.

ஆயிரம் குற்றவாளிகள் தப்பித்தாலும் ஒரு நிரபராதி தண்டிக்கப்பட்டு விடக் கூடாது என்ற உயரிய அரசியல் காப்புடன் ஒரு அரசாங்கத்தை நடத்தக் கூடிய எனது அரசாங்கம் , எனது தாய்நாட்டு அரசாங்கம் இன்று எனது எதிரியுடன் , எனது இனத்தைக் கொன்றழித்த ஒரு இனத்துடன் உறவு கொண்டாடுகிறது.

அப்படியானால் ????

என்னை அசிங்கப்படுத்துகிறது எனது இந்தியா ...!

எனது அடையாளத்தை அசிங்கப்படுத்துகிறது எனது இந்தியா...!

எனது உணர்வுகளை மதிக்கவில்லை எனது இந்தியா ....!

எனது இனத்தானின் நியாயத்தை மதிக்க வில்லை இந்த இந்தியா....!


இப்போது இந்தியாவிடம் அவமானப் பட்ட தமிழர்களாகிய நாம் என்ன செய்ய இயலும் ? நாம் என்ன செய்ய வேண்டும் ?