மீட்பர்களுக்கு ஏங்கும் இலங்கையும் , முற்றுகையில் இந்தியாவும்.!

உலக அரசியலின் போக்கு இன்னுமொரு முறை மாறியிருக்கிறது. கடந்த நூற்றாண்டில் பாரிய மாற்றங்களைச் சந்தித்த உலக அரசியல் இப்போதும் ஒரு பெரிய அரசியல் மாற்றத்திற்கான சூழலில் இருப்பதாகவே உணர்கிறேன்.

கடந்த நூற்றாண்டின் ஐந்து மிகப்பெரிய அரசியல் மாற்றங்களாக முதல் உலகப்போர் , இரண்டாம் உலகப் போர் , காலனி ஆதிக்கத்திற்குட்பட்ட நாடுகளின் விடுதலை , பனிப்போர் காலம் , பொருளாதார வல்லரசுகள் என்று வகைப்படுத்தலாம்.

முதல் உலகப்போர் , ஐரோப்பாவின் வளத்தை சிதைத்தது , அப்போது ஜெர்மனி அடைந்திருந்த பாரிய தோல்விதான் இரண்டாம் உலகப் போருக்கும் ஹிட்லர் மூலமாக வித்திட்டது எனலாம்..

இரண்டாம் உலகப் போரின் முடிவில் தான் காலனியாதிக்கத்தின் முடிவும் அடங்கியிருந்தது..உலகில் புதுப்புது நாடுகள் உருவாகின…உலகத்தின் அரசியலில் மிகப்பெரிய மாற்றங்கள் உருவாகின.

ஒருபுறம் சோவியத் கூட்டமைப்பும் , மறுபுறம் அமெரிக்காவுமாக தத்தமது அதிகாரத்தை நிலைநாட்ட போட்டி போட்ட காலமே பனிப்போர் காலமென வழங்கப்படுகிறது…….ஐரோப்பாவை மையப்படுத்தி நேட்டோ கூட்டமைப்பினை அமெரிக்கா உருவாக்க , கிழக்கு யூரோப்பிய நாடுகளையும் , ஓரிரு மத்திய கிழக்கு நாடுகளையும் மையப்படுத்தி ரஷ்யா வார்சோ ஒப்பந்தத்தை ஏற்படுத்தி தமக்கான கூட்டணியை வசப்படுத்திக்கொண்டது.....

இரண்டு நாடுகளும் விளையாடும் மைதானங்களாக வியட்நாம் , ஆப்கானிஸ்தான் , க்யூபா ஆகியவை இருந்தன. க்யூபா ஒரு கம்யூனிச நாடு என்ற வகையில் ரஷ்யா அதற்கு முழு ஆதரவினை வழங்கியதோடு மட்டுமின்றி தனது இராணுவக் கேந்திரமாகவும் மாற்றிக்கொண்டது.

இந்தப் பனிப்போர் தான் ஆசியாவின் பழம்பெருமை வாய்ந்த ஆப்கானிஸ்தானை சிதைத்தது. ரஷ்யாவின் ஆக்கிரமிப்பை எதிர்த்துப் போர்புரிய அமெரிக்கா தாலிபான்களை உருவாக்கியது…இன்று விந்தையாக அதே தாலிபான்களை எதிர்த்துச் சண்டைபோடுவது தனி கிளைக்கதை.! இங்கு சோவியத் தோல்விற்று வெளியேறியது.

வியட்நாமில் , அமெரிக்கா ஒருபுறமும் , ரஷ்யா/சீனா இன்னொரு புறமும் வியட்நாமைத் துண்டாடினார்கள்….இறுதியில் அமெரிக்கா தோல்வியுற்று வெளியேறியது.

இப்படி இரு பெரும் நாடுகளும் விளையாடிய கபடி விளையாட்டில் தத்தமது நாடுகளும் சிக்கிக்கொள்ளக் கூடாது என்று விரும்பிய மூன்றாம் உலக நாடுகள் அணிசேரா நாடுகள் என்ற கூட்டமைப்பினை அமைத்தன.

அமெரிக்க சதியினாலும் , உள்நாட்டு குழப்பத்தாலும் சோவியத் கூட்டமைப்பு உடைந்து போனது பனிப்போரில் முடிவிற்கு வழிவகுத்தது. அமெரிக்கா ஒருமுக வல்லரசானது….இந்த ஒரு முக வல்லரசுக்கு கடந்த நூற்றாண்டில் பெரும் பொருளாரதார வளமீட்டித்தந்தது உலக வணிகத்தின் பெரும் பங்கு டாலர் மூலமாக நிகழ்ந்ததே….! வெறும் பேப்பரை வைத்துக்கொண்டு உல்கத்தின் வணிகத்தை கட்டியாண்டது அமெரிக்கா.

அதற்கு கொஞ்சமாவது ஈடுகொடுக்கும் வண்ணம் யூரோ நாணயமும் வளர்ந்தது…….அமெரிக்காவின் வல்லாண்மைக்கு தடையாக இருந்த சதாம் ஹுசேனும் கொன்றொழிக்கப்பட்டார்….இன்று ஈரானும் அதே காரணத்தை வைத்து மிரட்டப்படுகிறது.

கடந்த நூற்றாண்டின் பிற்பகுதியில் அமெரிக்க வல்லரசுக்கு சவால் விடுக்கும் வகையில் மூன்று நாடுகள் வளர்ந்தன. அவைகள் முறையே சீனா , இந்தியா மற்றும் பிரேசில். தகவல் தொழில்நுட்ப புரட்சி இந்தியாவீன் வளர்ச்சிக்கு அடிகோலியதென்றால் சீனாவின் வலுவான தயாரிப்புத் திறன் சீனாவை முன்னோக்கித் தள்ளியிருந்தது. சத்தமில்லாமல் வளர்ந்து கொண்டிருக்கிற ப்ரேசில் இன்று உலகிலேயே பயணிகள் விமானம் தயாரிக்கும் மூன்று நாடுகளில் ஒன்றாக வளர்ந்திருக்கிறது. ( அமெரிக்கா (போயிங்), ருஷ்யா , - ஏர்பஸ் தனிப்பட்ட நாடுகளுக்கு சொந்தமானதல்ல , பல யூரோப்பிய நாடுகளின் கூட்டமைப்பில் உருவானது ) .

இந்தியாவும் , பிரேசிலும் குறிப்பிடத்தகுந்த வளர்ச்சியை பெற்றிருந்தாலும் சீனாவின் வளர்ச்சிக்கும் , அந்நாட்டின் அந்நியச் செல்வாணி கையிருப்பும் , உலக வணிகத்தின் கணிசமான அளவு ஆதிக்கம் செலுத்துவதற்கும் எவ்விதத்திலும் அருகாமையில் இல்லை.

அமெரிக்க வல்லரசுக்கு இணையாக கூடிய விரைவில் வரக்கூடிய வாய்ப்பு சீனாவிற்கு என்பது உறுதி செய்யப்பட்ட ஒன்று. தற்போது நிலவும் பொருளாதார நெருக்கடியும் கூட ஆசியாதான் இந்த நூற்றாண்டை ஆளப்போகிற கண்டமாக மாறியிருப்பதை உறுதிப்படுத்துகிறது…

இச்சூழல் உருவாகத் தொடங்கியிருந்த காலம்தான் இலங்கையில் போர்மேகங்கள் உருவாகத் தொடங்கியிருந்தன….ஆசியக்கடல்வழிப்பாதையில் மிக முக்கிய கேந்திரத்தில் உள்ள இலங்கையின் மீது ஆதிக்கம் செலுத்த ப்ராந்திய வல்லரசுகள் ஆதிக்கம் செலுத்துவதில் உள்ள முக்கியத்துவம் புரிந்து கொள்ளக்கூடியதுதான்.!

ஆகவே இலங்கையின் மீது ஆதிக்கம் செலுத்த விரும்பிய நாடுகள் பட்டியலில் சீனா , பாகிஸ்தான் , மேற்குலகம் இவைகளும் இணைந்தன….அதுகாறும் ஏகபோகமாக இலங்கையில் ஆதிக்கம் செலுத்திக்கொண்டிருந்த இந்தியா , ஒருகாலத்தில் தமிழீழப் போராளிகளுக்கும் கூட உதவிக்கொண்டே இருந்தது. புலிகள் செய்த ஒரே தவறான இராஜிவ் கொலை என்ற காரணத்தைச் சுமத்தி சிங்களத்துக்கு மறைமுகமாக உதவி தமது கைப்பிடியில் இலங்கையை வைத்துக்கொள்ளலாம் என்று கணக்குப் போட்டது.

பாகிஸ்தானும் , சீனாவும் எதிரிக்கு எதிரி நண்பன் என்ற முறையில் நட்பு நாடுகள்….தமிழகத்து எதிர்ப்பின் காரணமாக சிறுகச் சிறுக உதவிக்கொண்டிருந்த இந்தியாவின் உதவி இலங்கைக்குப் போதுமானதாக இருக்கவில்லை என்றால் புலிகள் எவ்வளவு தீர்க்கமாக போரிட்டு இருப்பார்கள் என்று யோசித்துக்கொள்ளூங்கள். ! சீனாவையும் , பாகிஸ்தானையும் ஆயுதத்திற்காக நாடியது. இந்தியாவை முற்றுகைக்குள்ளாக்கும் நோக்கில் மேற்கே பாகிஸ்தானையும் , வடக்கே சீனாவையும் , கிழக்கே மியான்மரையும் தனது கையில் வைத்துக்கொண்டிருக்கும் சீனாவோ அதுதான் சமயம் என்று இலங்கைக்கு உதவிகளை அள்ளி வழங்கியது..!

இதுதான் புலிகளை ஒழிக்க சரியான தருணம் என்று கணக்குப் போட்ட இலங்கையோ முற்றுமுழுதாக கிழக்கு நாடுகளையே சார்ந்திருக்க ஆரம்பித்தது…..மனித உரிமைக்குழுக்களும் , மேற்குலக இராஜதந்திரிகளும் விடுத்த வேண்டுகோள்களையெல்லாம் அலட்சியப் படுத்தியது. தனது கொடூரக் கொலைக் கரங்களை தமிழ் மக்களின் மேல் செலுத்தியது.

அன்றைய அலட்சியம்தான் இன்றைய இடியாப்பச் சிக்கலுக்குக் காரணம் என்ற புரிதல் கூட இலங்கையின் ஆட்சியாளர்களுக்கு இல்லை என்பதைத்தான் தற்போதும் அவர்கள் வெளியிடும் கருத்துக்கள் காட்டுகின்றன.! அது என்ன இடியாப்பச் சிக்கல்? பார்ப்போம்!

பதிவின் நீளம் கருதி அடுத்தபாகமும் வெளிவரும்!